قېنى مەن بىلەن يۈرۈڭ!

ئاپتورى: تارىق ھىشام

 

تۇيۇقسىز بىرەر سۆھبەتكە داخىل بولۇپ قالىسىز، ياكى توردا بىرەر ئۇچۇر ئوقۇيسىز… بۇلاردا قەستەن ياكى بىخەستىلىكتىن خاتا ئۇچۇرلار ياكى يالغان دىنى مەلۇمات – يالغان ھەدىس، يالغان دىنى قىسسەلەر – بارلىقنى بايقايسىز.. سىز باشقا ئىشىڭىز تۇرسىمۇ، ياخشىلىققا بۇيرۇپ يامانلىقتىن توسۇش ۋاجىبى يۈزىسىدىن، ئۇلارنىڭ خاتالىقىنى كۆرسىتىپ بېرىسىز ياكى نەسىھەت قىلىسىز… نىيىتىڭىزخالىس، ئۇسۇلىڭىز توغرا بولسا، بەلكىم سۆزىڭىزنىڭ ئۈنۈمى بولىدۇ ۋە كىشىلەرنى ۋە ئىدىيەسىنى تورا يولغا باشلىيالايسىز …
مانا بۇلارنى مەن، ”ھازىرنىڭ نەق ئىبادىتى“ جۈملىسىدىن دەپ قارايمەن …

”ھازىرنىڭ ئىبادىتى“ دېگەن نېمە بىلەمسىز؟
ھازىرنىڭ ئۆزىدە، مۇشۇ ۋاقىتنىڭ ئۆزىدە سىزنىڭ قىلىشىڭىز كېرەك بولغان ئەمەلدۇر. ئىنسان قىلالايدىغان سالىھ ئەمەللەرنىڭ كۆپلىكىدە، كىشى قانداق ئەمەلنىڭ قانداق چاغدا بەكراق مۇھىملىقىنى بىلىشى كېرەك. بىر ۋاقىتتا، بىر ئورۇندا مەلۇم بىر ئەمەل ئەڭ مۇھىم بولسا، يەنە باشقا بىر ۋاقىتا، باشقا بىر ئورۇندا، يەنە باشقا بىر ئەمەلنىڭ ئالدىنقى ئەمەلدىن بەكراق مۇھىم بولىدىغانلىقىنى بىلىش كېرەك.

مەسىلەن : ئىش ياكى خىزمەت ئۈستىدە بولغىنىڭىزدا( مەكتەپتە، دوختۇرخانىدا، زاۋۇتتا، شىركەتتە، دوكاندا، ئېتىزدا، لابىراتوردا…) ئىشىڭىزنى ۋايىغا يەتكۈزۈپ، پۇختا قىلىشىڭىز، ئاللاھ ئالدىدا ئەڭ ئەۋزەل ئىبادىتىڭىز بولىدۇ.. نامازغا ئەزان توۋلىغاندا، ناماز ئوقۇشىڭىز ئەڭ ئەۋزەل ئىبادەت بولىدۇ…

ئەگەر سىز جامائەت نامازدا تۇرۇپ، يېنىڭىزدىكى نامازخان ھۇشىدىن كېتىپ، سىزنىڭ ياردەم قىلىشىڭىز كېرەك بولسا، پەرز ناماز بولسىمۇ ئۇنى كېسىپ، شۇ نامازخاننى قۇتقۇزىشىڭىز ئەڭ ئەۋزەل ئىبادەت بولىدۇ.. مانا بۇ، ئەڭ ياخشى ئەمەلنىڭ، ئاشۇ ۋاقىتتىكى ئاللاھقا ئەڭ سۆيۈملۈك بولغان ئەمەل ئىكەنلىكىنى بىلدۈرىدۇ .

يەنە تەسەۋۋۇر قىلىڭ.. ئۆيىڭىزدا بېرىلىپ قۇرئان ئوقۇۋاتاتتىڭىز.. بىر قوشنىڭىز ئىشىك چېكىپ، ئۆيىڭىزگە مېھمان بولۇپ كىردى.. بۇ چاغدا قايسىسى ئەۋزەل؟؟ قۇرئاننى ئوقۇۋېرىشىڭىزمۇ ياكى مېھماننى كۈتىشىڭىزمۇ؟؟ تەسەۋۋۇر قىلدىڭىزمۇ؟

قۇرئاننى قويۇپ، مېھماننى ئىززەت – ئىكرام بىلەن كۈتىسىز.. مانا بۇ ھازىرنىڭ ئىبادىتى… مانا بۇ ئىسلام.. ئىنسانىيەتنىڭ تەبىئى دىنى..

يەنە بىر ئىشنى تەسەۋۋۇر قىلىڭ: بىر ئوقۇغۇچى، ئۇنىڭ ئەتە ئىمتاھانى بار. ئۇ، مەسچىتكە بېرىپ ئۇ يەردە ۋەز ئاڭلىماقچى…
بۇ ئوقۇغۇچىغا دەيمىزكى، سىزگە نىسبەتەن، ھازىرنىڭ ئىبادىتى ئەتىكى ئىمتاھانىڭىزغا تەييارلىق قىلىشىڭىزدۇر(بەك ئۆگىنىۋېتىپ ئارام ئالىدىغان بولسا، بۇ باشقا)..سىزنىڭ ئىمتاھانغا تەييارلىق قىلىشىڭىز مەسچىتتىكى ئۇ ۋەزنى ئاڭلاشتىن ئەۋزەلدۇر..

يەنە بىر مىسال : بىر ئايال نەپلە روزا تۇتتى.. يولدىشى ئۇنى چاقىردى.. ئايالى روزىسىنى بۇزۇپ يولدىشىغا جاۋاپ بەردى.. مانا بۇ – يولدىشىنىڭ ھاجىتىدىن چىقىش- ئۇ نەپلە روزىدىن ئەۋزەلدۇر..

دېمەك، ئاللاھنىڭ ھوزۇرىدىكى ئەڭ ئەۋزەل ئىبادت، ۋاقىت ۋە زامانىغا قاراپ ئوخشىمايدۇ.. بىزنىڭ ھازىرقى زامانىمىزدا مۇسۇلمانلار ھەر جەھەتتىن ئارقىدا تۇرىۋاتىدۇ.. سانى ئازلىقتىن ياكى تەبىئى بايلىقى ئازلىقتىن ئەمەس، بەلكى، ئىلىمگە سەل قارىغانلىقتىن، چېرىكلىك ئەۋج ئالغانلىقتىن، ھەتتا بەزىبىر تەقۋادار دەپ قارالغانلارنىڭمۇ ئەخلاقىنىڭ ناچارلىقىدىن دېگەندەك نۇرغۇن سەۋەپلەر سەۋەبىدىن…

ئۆز ئوزىقىنى ئۆزى تېرىمايدىغان، ئۆزىگە لازىملىق نەرسىلەرنى ئۆزى ياسىمايدىغان، ئادالەت تۇرغۇزمىغان، ھەق – ھوقۇق دەپسەندە قىلىنىدىغان ئۈممەت تەرەققىي قىلغان ئۈممەت بولالمايدۇ. بۇ ھالەتتە، ئىلىم ئۆگۈنۈش، تارقىتىش، بىلىم مەدەنىيىتى بەرپا قىلىش، ئاللاھ ئالدىدا ئەڭ ئەۋزەل ئەمەل بولىشى مۇمكىن..

بىر ئانىنىڭ ياراملىق بىر ئەۋلات تەربىيلەپ چارچىشى، نەپلە روزا تۇرۇپ چارچىغىنىدىن ئەۋزەل بولىشى مۇمكىن.. چۈنكى ئۇ، ئۈممەت ئەڭ مۇھتاج ئەمەلنى قىلىپ ئاللاھقا ئىبادەت قىلدى. ئەلۋەتتە پەرزلەرنى تاشلىۋەتمىگەن شەرتتە.

بەلكى ئىچىڭىزدە دەۋاتقانسز : ئەي دوختۇر، گپىڭىز چۈشۈنۈشلۈك، ھەممىمز بىلىدىغان گەپ ! مەن سىزگە دەيمەنكى : بۇنى بىلگىنىڭىز ئۈچۈن ئاللاھقا شۈكۈر دەڭ. ئاندىن ئۇ گەپنى ئەمەلىيىتىڭىزدە تەتبىقلاڭ . چۈنكى مەن، خېلى يۇقۇرى شەرئى بىلىم ئالغان كىشىلەرنىڭمۇ بۇ ھەقىقەتنى ئاڭقىرىپ بولالمىغانلىقىنى كۆردۈم.

لىۋاننىڭ تارابلۇستا بىر شەرئىي مەھكىمىگە نىكاھ ئوقۇتقىلى كىرگەن ئىدىم. دەسلەپ بىر موللامنىڭ ئىمزاسىنى قويدۇرۇشۇم كېرەك ئىدى. ئۇنىڭ ئىشخانىسىغا كىرسەم قۇرئان ئوقۇۋاتقان ئىكەن.. ئالدىدا تۇردۇم ، ئۇ مېنى كۆرۈپ تۇرىدۇ-يۇ، لېكىن قۇرئان ئوقىۋەردى.

ئىچىمدە دەپ كەتتىم : ئەي ھۆرمەتلىك موللام، سىز بۇ ئىشخانىدا كىشىلەرنىڭ خىزمىتىنى قىلىش ، ئۇلارنىڭ ھاجىتدىن چىقىش ئۈچۈن ئولتۇرىسىز، قۇرئان ئوقۇش ئۈچۈن ئەمەس. خىزمەتتىن سىرتقى ۋاقتىڭىزدا خالىغانچە قۇرئان ئوقۇڭ، لېكىن سىز خىزمىتىنى قىلىدىغان كىشىلەر كەلگەندە، سىزنىڭ ئىمزايىڭىزغا مۇھتاج بىرى كەلگەندە، سىز قىلىدىغان ئىبادەت شۇلارنىڭ ھاجىتىنى راۋا قىلىشتۇر..

ئەمدى ئامماندىكى مېنىڭ ئامراق دوختۇرخانام ، بەشىر دوختۇرخانىسىغا كېلەيلى. سىزگە يەنە بىر مىسال بېرەي :
توغۇت ئوپىراتسىيەسى ئۈستىدە تۇرساق بامداتقا ئەزان چىقتى. ئانىغا ئوكسىگىن نەيچىسى تاقاپ تەييار قىلىپ بولغان ئىدۇق. يېنىمدىكى ياردەمچىمگە دېدىم : laryngoscope نى ئوبدانراق يۇيۇپ سالغىن.. ئۇ ئېرەنشىمەيلا چاتاق يوق، لېكىن ھازىر ناماز ئوقۇشۇم كېرەك دېدى.

سىزچە بۇ كىشى ئاللاھقا ئىبادەتنىڭ ھەقىقى مەنىسىنى بىلگەنمىدۇ؟
ئالدىرىماڭ ! مېنى خاتا چۈشەنمەڭ ! مەن بامدات نامىزىنى جامائەتكە قاتنىشىپ ئوقۇشقا قارشى ئەمەسمەن . لېكىن، ھازىرنىڭ ئىبادىتى بولىۋاتقان ئىشنى ئەڭ ياخشى شەكىلدە قىلىش، يەنى ئاشۇ ئوپىراتسىيە قىلىنماقچى بولغان ئانىغا لازىملىق سايماننى نامازغا بېرىشتىن بۇرۇن ئوبدان تازىلاش كېرەك ئىدى. ( ئۇ ياردەمچى جىددى ئوپىراتسىيەدە بولغانلىقى ئۈچۈن جامائەت نامىزىغا چىقمىىسىمۇ بولاتتى).. ئۇ كىشى ئاشۇ تازىلانمىغان سايماننى ئۆزىنىڭ تۇققىنىغا قوللىنىشنى ماقۇل كۆرەرمىدى؟

بەشىر دوختۇرخانىسىدىن يەنە بىر مىسال : لېكىن بۇ قېتىمقىسى ئىجابى . ئاياللار تۇغۇت بۆلىمى مۇتەخەسسىسى بىر ئايال دوختۇر بار بولۇپ، ئۆزى خىرىستىئان، كېيىن ئىسلامنى چۈشۈنۈپ مۇسۇلمان بولغان ئىدى.

بامداتقا يېقىن جىددى كەلگەن بىر ئانىنى ئوپىراتسىيە ئۈچۈن ناركوز قىلدىم . ئاندىن بالىنىڭ سالامەتلىكى ۋە ئانىنىڭ ھالىتىنىڭ مۇقىمدالغانلىقىنى پەملەپ، ئىشىكنى ئوچۇق قويۇپلا چىقىپ كەتتىم . ئۇدۇلدىكى دوختۇرلار ئىشخانىسىغا كىرىپ، جەينامازنى سېلىپ ئىككى رەكئەت نامازغا تۇرۇشقا تەمشەلدىم.. دەل مۇشۇ چاغدا، ئوپىراتسىيە قىلىشقا تېگىشلىك يەنە بىر كېسەلنىڭ خەۋىرى كەلدى. بۇ ئايالنىڭ تۇغۇتى تەسلىىشىپ، ھامىلە بېسىمدا قالغان ئىدى (fetal distress).. خەۋەر بەرگەن كىشىگە دېدىم :مۇشۇ ئىككى رەكئەت نامازنى ئوقۇۋالاي، ئاندىن ئۇنى ناركوز قىلاي..

بۇ چاغدا ھېلىقى دوختۇرنىڭ ئاۋازى كەلدى : دوختۇر، ھازىر ناماز ئوقۇماقچى بولسىڭىز مەيلى، ئەمما مۇشۇ سەۋەپلىك سىز ئانىنى ناركوزلىماي، ھامىلىگە بىرەر كېلىشمەسلىك كەلسە، سىزنىڭ نامىزىڭىز ھالال ئەمەس دېدى.
شۇنداق، ”نامزىڭىز ھالال ئەمەس “ دېدى..

ئۇ مېنى مات قىلغان ئىدى. دەرھال ئوپىراتسىيە ئۆيىگە قايتىپ ھېلىقى ئانىنى ناركوزلىدىم. ئاندىن ناماز ئوقۇدۇم.. ئۆزەمگە سوئال قويدۇم : ئەگەر مەن ناماز ئوقۇيمەن دەپ، ناركوز كېچىككەن سەۋەپلىك ھامىلىگە زەرەر يەتكەن بولسا ئۆزۈمدىن رازى بولۇرمىدىم ؟

بەزى ئەرەب دۆلەتلىرىدە ھۆكۈمەت ئورۇنلىرىدا خىزمەت قىلىدىغانلار ناماز ئوقۇش باھانىسى بىلەن نامازدىن يېرىم سائەت بۇرۇن چىقىپ، نامازدىن يېرىم سائەت كېيىن قايتىشىدۇ. بۇلارغا دەيمەنكى : ئىنساپ قىلىڭلار! سىلەر كىشىلەرنىڭ ئىشلىرىنى توختۇتۇپ قويۇپ، ئۇلارنىڭ ۋاقتىنى ئېلىشىڭلار، پەرز ناماز ئوقۇيتتۇق دېسەڭلارمۇ دىندارلىقتىن، ئىمان ۋە ئېھساندىن تولىمۇ يىراق.

پەيغەمبېرىمىزنىڭ مۇنۇ ھەدىسىنى ئويلىنىپ كۆرەيلى:
ئەنەس رەزىياللاھۇ ئەنھۇ پەيغەمبەر ئەلەيھىسسالامنىڭ مۇنداق دېگىنىنى يەتكۈزگەن :
“ ئەگەر قىيامەت قايىم بولۇپ بىرىڭلارنىڭ قولىدا (تىكمەكچى بولغان ) بىر كۆچەت بولۇپ قالسا ، ئۇنى تىكىۋىتىشكە قادىر بولالىسا، تىكىۋەتسۇن»

دىققەت قىلدىڭلارمۇ ؟ قىيامەت بولدى، دۇنيادىكى ھەممە نەرسە يوقالماقچى.. قولىڭىزدا تىكمەكچى بولىۋاتقان بىر كۆچەت بار، نەچچە يىلدىن كېيىن ئاندىن مىۋە بېرىدۇ.. يەنى ئۇنىڭ مىۋىسىنى كۆرەلمەيمىز..
ئاندىنچۇ؟؟ مۇشۇنداق دەپ كۆچەتنى تاشلاپ، قۇرئان ياكى ناماز ئوقۇمسىز؟
ياق، بەلكى ياخشى ئىشىڭىزنى داۋاملاشتۇرىۋېرىسىز..

ئاللاھ پاكتۇر، ئۇنىڭغا ھەمدۇ-سانالار بولسۇن.. مەن خىزمەتداشلىرىمغا دەپ كەلدىم : ئەگەر قىيامەت قايىم بولۇپ، سىلەرنىڭ بىرىڭلار ئوپىراتسىيەخانىدا، كېسەلگە ئوكسىگىن تاقىۋاتقان بولسا، كىشىلەرگە خىزمەت – ئاللاھ يولىدا ئىخلاس بىلەن قىلىۋاتقان شۇ ئىبادىتىڭىز-نى داۋاملاشتۇرىۋېرىڭ… شەرىئەت جەھەتتىن سىزنىڭ قىلىشڭىز كېرەك بولغىنى شۇ. باشقا ئىشلارنى قىلىدىغانلارمۇ مۇشۇنىڭغا ئۆزىنىڭ ئىشىنى سېلىشتۇرسا بولىدۇ.

بىز دىنىمىزنى توغرا چۈشۈنۈپ، ھەقىقى ئەمەل قىلغان كۈنى نېمە ئىشلار بولۇپ كېتىدىغانلىقىنى تەسەۋۋۇر قىلدىڭىزمۇ ؟ ئىسلامنىڭ نەقەدەر كاتتىلىقىنى تەسەۋۋۇر قىلدىڭىزمۇ ؟ ئىنسانىيەتنىڭ تەبىئى دىنى بولغان بۇ دىندا ئاخىرەتكە ئاپىرىدىغان يول دەل دۇنيا يولىدۇر. بۇ يولدا ئىش بىلەن ئىبادەت ئايرىۋېتىلمىگەن . ئىسلامدا ئىككىلىسى بىر، يۇغۇرلۇپ كەتكەن.. بىردىنبىر توغرا بولغان ئاشۇ يولدا ئىككىسى بىللە ماڭىدۇ …

كېلىڭ بىللە دۇئا قىلايلى :
پەرۋەردىگارىم بىزنى ئىجابي، نەتىجىلىك مۇسۇلمانلاردىن قىلغىن.. سالىھلارغا ھەمراھ قىلغىن !

تەرجىمە قىلغۇچى: قارلۇق

مەنبە : https://islamonline.net/sahem/19794