باغدادىنىڭ ئۆلۈشى بىلەن دائىش يوقىلامدۇ؟

ئاپتورى: شەمسۇددىن ئەلنەققاز (تۇنىس)

پات پات دۆلەت تەشكىلاتى باشلىقى ئەبۇ بەكرى باغدادىنىڭ ئامېرىكا ياكى روسيە ھاۋا ھۇجۇمىدا ئۆلتۈرۈلگەنلىك خەۋېرى چىقىپ تۇرىدۇ. باغدادى  بولسا ئارىلىق تاشلاپ ئانچە مۇنچە ئاۋازلىق بايانات ئېلان قىلىپ، جەڭچىلىرىگە ئۇرۇشنى داۋاملاشتۇرۇشنى تەشۋىق قىلىۋالىدۇ.

قارىغاندا باغدادى، ئىتتىپاقداش ئارمىيە ، روسىيە ۋە ئىراق ئارمىيەسىنىڭ ھاۋا ھۇجۇمىدا ئۆلگەنلىكى ھەققىدىكى رېكورتىنى بۇزۇپ تاشلىغاندەك قىلىدۇ.  دۇنيادىكى بىرىنچى نۇمۇرلۇق ئىزدىلىۋاتقان كىشى، بۇ خەۋەرلەرنى ئۆزىنى سىرتتا تەشۋىق قىلىشتىكى پۇرسەت ، يېنىدىكىلەرگە بولسا قىزىقارلىق بىر يۇمۇر سۆزلەپ ، كەيپىياتىنى ئۈستۈرىدىغان پۇرسەت دەپ بىلسە كېرەك.

ئالدىنقى ھەپتە روسىيە مۇداپىئە مېنىستىرلىكى باياناتىدا سوخوي35 ۋە سوخوي 34 كۆرەشچى ئايروپىلانلىرىنىڭ 28.مايدا دۆلەت تەشكىلاتىنىڭ رەققەنىڭ جەنۇبىدىكى بىر يىغىلىشىغا ھاۋادىن ھۇجۇم قىلغانلىقىنى، بۇ ھۇجۇمدا باغدادىنى ئۆز ئىچىگە ئالغان دائىش باشلىقلىرىنىڭ ئۆلتۈرۈلگەنلىنى ئېلان قىلغان .

يۇقارقى باياناتتا يەنە، بۇ قېتىمقى روس ھۇجۇمىدا ئۆلگەن دائىش باشلىقلىرىنىڭ 30، ئەسكەرلەردىن 300 ى ئىكەنلىكى، ئارىسىدا رەققە ئەمىرى ئەبۇھەججى ئەلمىسرى، رەققەدىن سۇخنەگىچە بولغان رايۇن ئەمىرىى ئىبراھىم نايىف ئەلھاج ۋە دائىش ئىستىخبارات باشلىقى سۇلايمان شەۋۋاھ بار دەپ ئېلان قىلىنغان.

روسىيە مۇداپىئە مېنىستىرلىكىنىڭ بۇ باياناتى مىسلىسىز يالغانغا  تولغان بولۇپ، ئىتتىپاقداش ئارمىيە باياناتچىسى ريان دايلۇن بۇ خەۋەرنىڭ  راستلىقىدىن گۇمان قىلىدىغانلىقىنى بىلدۈرۈپ، باغدادىنىڭ ئۆلگەنلىكىنى جەزملەشتۈرەلمەيدىغانلىقىنى ئېيتقان . نەتجىدە روسىيە تەرەپ تىزلا تېمىنى ئۆزگەرتىپ، باغدادىنىڭ يۇشۇرۇنغا ئورنىنى ئېچىپ تاشلايدىغان باشقا بىر ئەپقاچتى گەپ چىقارماقچى بولغان.

بىز بۇ ئۇچۇرلارنى ئازراق تەھلىل قىلىپ سوئال قويۇپ باقايلى. ھەر تەرەپتە مۇھاسىرە ئىچىدە قالغان بىر تەشكىلات قانداقسىگە بۇنچە كۆپ ئادەمنى كەلگۈسى پىلانلىرىنى تۈزىش ئۈچۈن بىر يەرگە يىغالىدى؟

ئىككىنچى سوئال بولسا : ھەر تۈرلۈك ئايروپىلانلار رەققا ئاسمىنىدا ئايلىنىپ يۈرگەندە، 300 دىن ئارتۇق ئادەمنى بىرلا ۋاقىتتا سىغدۇرغىدەك ئورۇن بارمىكەن؟؟
ئۈچۈنچى سوئال : قايسى بىر ئەقىل ئېگىسى بۇنداق ئەقىلگە سىغمايدىغان روس ھېكايىسىگە ئىشەنسۇن؟

بىز بۇ بايانات ھەققىدە ئارتۇق گەپ قىلمايمىز. ئەمما ئەبۇ بەكرى باغدادىنىڭ ھازىرقى رولى ۋە ئۇنىڭ ئۆلىمىنىڭ تەشكىلات ۋە ئەسكەرلىرىگە ۋە ئۇنىڭدىن جاق تويغان ”پۇقرالىرى“غا قانچىلىك تەسىرى بارلىقى ھەققىدە،  شۇنداقلا ئىتتىپاقداش ئارمىيە ھەم روسىيەنىڭ پات – پات ئۇنىڭ ئۆلىمىنى ئېلان قىلىشتىكى مەقسىدى ھەققىدە توختىلايلى.

ئەبۇ بەكرى باغدادىنىڭ ئەسلى ئىسمى ئىبراھىم ئاۋاد ئىبراھىم ئەلبەدرى، ئۇ باغدادنىڭ شىمالىدىكى سامەررا شەھرىدە 1971 .يىلى سۈننى  ئائىلىدە تۇغۇلغان . بىر مەزگىل جىھاد تەشكىلاتىغا يىتەكچىلىك قىلىپ، 2014. يىلى ئىيۇندا سايكس پىكو چېگرالىرىنى بۇزۇپ، خىلاپەتلىك ئېلان قىلىپ پۈتۈن دۇنيانى ھەيران قالدۇرغان  بولۇپ، ئاددەتتىكى بىر شەخس ئەمەس .

ساددام ھۈسەين ئىسلام تەتقىقاتلىرى ئۈنىۋېرسىتدىن قۇرئان تەتقىقاتلىرىدا دوكتۇرلۇقنى ئالغان باغدادى ناتىقلىقى بىلەن رەھبەرلىك سالاھىتىگە ئېگە شەخس. كۈزەتكۈچىلەر ۋە تەھلىلچىلەر ئىبراھىم ئاۋاد ئەلبەدرىنى ئۇستا ناتىق، قۇرئان ۋە ھەدىستىن دەلىل ئېلىشقا كەلگەندە، سۆزلىرىنى ئىنتايىن ئىنچىلىك بىلەن تاللايدۇ دېيىشىدۇ.

دائىشنىڭ كېڭەش مەجلىسىدىكىلەر باغدادىنىڭ ئۆلىمىنىڭ، خىلاپەت دۆلىتىنىڭ دەردىنى كۆپەيتىۋېتىدىغانلىقىنى ئوبدان بىلىدۇ. ئامېرىكا ئىراقنى بېسىۋالغاندا ”بوكا“ تۈرمىسىدا تۇرغان ئون ئايدا جىھادچىلارنى ئۆزىگە قارىتىۋالغان باغدادى، خىلاپەتلىك ئېلان قىلىپ پۈتۈن دۇنيانى ھەيران قالدۇرغان ئىدى. بۇنىڭ بىلەن ئۇ، بازا تەشكىلاتى باشلىقى ئەلزاۋاھىرىنى ئىچىگە ئالغان باشقا جىھادچىلاردىن دىققەتنى ئۆزىگە تارتىپ كەلگەن.

جىھادچىلار يازمىلىرىدا،  باشلىقلىرىنىڭ ئۆلۈمىنىڭ ئۇلارغا چوڭ تەسىرى بولمايدىغانلىقى، ئۇلارنى تۇتقان يولىدىن گۇمانلاندۇرۇشنىڭ ئەكسىگە، تېخىمۇ ئىشەنچىسىنى ئاشۇرىدىغانلىقىنى تەكىتلىشىدۇ.
دائىشنىڭ بىرىنچى ۋە ئىككىنچى سەپ باشلىقلىرىدىن نەچچە ئونى ئۆلگەن بولسىمۇ، تەشكىلات ئىچكى كىرىزىس ياكى بۆلۈنۈش خەۋپىگە دۇچ كەلمىدى. لېكىن ئىككى يىل بۇرۇن ”بىلمىگەن كىشىنىڭ ئۆزرىسىنى قوبۇل قىلىش“ مەسىلسى ھەققىدە باغدادىنى كاپىرغا چىقارغان بىر قىسىم موللىلىرىنى ئۆلتۈرۋەتكەن.

ئامېرىكا ۋە روسىيەنىڭ باغدادىنى ئۆلتۈرۈش ئۈچۈن رېقابەتلىشىشى، ئۇزۇنغا سوزۇلغان بۇ ئۇرۇشتا مەنىۋى غەلىبىگە ئېرىشىشنى مەقسەت قىلىدۇ. لېكىن كۆپلىگەن كىشى، پات پات باغدادىنىڭ ئۆلگەنلىكىنى ئېلان قىلىشنىڭ ئارقىسىدا باغدادى ياكى ئۇنىڭ يېقىنلىرىنىڭ ئۆز ئارا قىلغان ئالاقىسىنى قولغا چۈشۈرۈش مەقسەت قىلىنىدىغانلىقىنى بىلمەيدۇ.

ئاخىرىدا دەيمىزكى، ئەمەلىيەتتە باغدادىنىڭ ئۆلىمىنىڭ دائىشقا بولىدىغان تەسىرى بەكمۇ چوڭ، گەرچە كېيىنكى خەلىپىنى تاللاش كېڭەش مەجلىسى تەرىپىدىن ئېنىق بىكىتىلگەن بولسىمۇ، شۇنىڭ بىلەن بىرگە يېڭى زامان تارىخىمزدىكى ئەڭ ۋەھشى تەشكىلاتنى قۇرغان كونىلار بىر بىرلەپ ئۆلتۈرۈلۈپ تۈگىدى. ئۇلار ئۆزلىرىدىن كېيىنكى يېڭى بىر ئەۋلاد ياشلار ۋە ‘خىلاپەت شىرلىرى“گە يول ئېچىپ قويۇپ كەتتى. لېكىن بۇ ياشلاردا كونىلاردىكى ئەقىل ۋە تەجرىبىلەر يوق. شۇڭلاشقا نەچچە ئون مىڭ ئەسكىرىى ئۆلۈپ تۈگىگەن بۇ تەشكىلات، ئىتتىپاقداش ئارمىيە ئىراق ۋە سۈرىيەدە بۇلارغا قارشى ئۈچ يىل بۇرۇن باشلىغان بۇ ئۇرۇشتا تىزلا يوقىلىپ تۈگىشى مۇمكىن .

تەرجىمە قىلغۇچى: ئۆچمەس

مەنبە: http://www.noonpost.org/content/18475